Lán til nýsköpunar

08. september 2017

NMI_Byggdastofnun2

Frá undirritun samningsins - Fv. Arnar Már Elíasson, Aðalsteinn Þorsteinsson, Þorsteinn I. Sigfússon og Sigríður Ingvarsdótttir. 

Byggðastofnun, í samstarfi við Nýsköpunarmiðstöð Íslands, hefur hleypt af stokkunum nýjum lánaflokki.  Nýsköpunarlán munu skapa grundvöll til aukinnar nýsköpunar og þar með aukinna atvinnutækifæra í landsbyggðunum. Aðgengi að fjármagni til nýsköpunar utan höfuðborgarsvæðisins hefur verið takmarkað og frumkvöðlar talið lítinn stuðning þar að finna. Nýsköpunarlánum er ætlað að bæta úr þessu með bættu aðgengi að þolinmóðu lánsfjármagni.

Nýsköpunarlán verða veitt til allt að fimm ára með sveigjanlegu endurgreiðsluflæði.  Hámarkslánveiting í hvert verkefni verður 5 m.kr. enda sé eiginfjárframlag að lágmarki jafnhátt.  Tryggingar verði í formi veðsetningu hugmyndar/vörumerkis/vöru/þjónustu en lánunum fylgir jafnframt breytiréttur í hlutafé.  Nýsköpunarmiðstöð Íslands mun greina lánsbeiðnir með tilliti til vægis nýsköpunar og skila umsögn til Byggðastofnunar til frekari úrvinnslu, ákvörðunar og afgreiðslu.

Myndin að ofan er tekin við undirritun samstarfssamnings. Frá vinstri: Arnar Már Elíasson forstöðumaður fyrirtækjasviðs Byggðastofnunar, Aðalsteinn Þorsteinsson, forstjóri Byggðastofnunar, Þorsteinn Ingi Sigfússon, forstjóri Nýsköpunarmiðstöðvar Íslands og Sigríður Ingvarsdóttir framkvæmdastjóri Nýsköpunarmiðstöðvar.

Á vef Byggðastofnunar má nálgast leiðbeiningar og umsóknarform fyrir nýsköpunarlán. Nánari upplýsingar veita Pétur Friðjónsson, lánasérfræðingur, peturf@byggdastofnun.is og Arnar Már Elíasson, forstöðumaður fyrirtækjasviðs, arnar@byggdastofnun.is.

 

NMI_Byggdastofnun3

Frá undirritun samningsins - Fv. Arnar Már Elíasson, Aðalsteinn Þorsteinsson, Þorsteinn I. Sigfússon, Sigríður Ingvarsdótttir, Berglind Hallgrímsdóttir, Elín Gróa Karlsdóttir og Jón Hreinsson.