Athafnateygja Innovit fór víða um land í alþjóðlegri athafnaviku sem nú er afstaðin og hafa tæplega 1000 einstaklingar um land allt komið stórum sem smáum verkefnum í framkvæmd. Fyrstu teygjuna fékk Katrín Júlíusdóttir iðnaðarráðherra afhenta og ákvað hún við opnun hinnar alþjóðlegu athafnaviku að afhenda Þorsteini I. Sigfússyni prófessor og forstjóra Nýsköpunarmiðstöðvar Íslands athafnateygjuna með þeim óskum að hann setti af stað skapandi aðgerð samkvæmt leikreglunum.

Þorsteinn ákvað að setja af stað eins konar teygjustökk sem öll bylta viðtekinni hefð í atvinnulífinu og kalla til þátttöku hóp aðila tengdum starfsstöðvum Nýsköpunarmiðstöðvar um allt land. Hér á eftir fara helstu atriði teygjustökkanna sem eru alls tíu talsins. Þessi atriði fjalla öll um nýmæli sem eru að gerast á þessu augnabliki:

Aðgerð 1: Setja af stað undirbúning fyrir stofnun á sprotafyrirtækinu VESTURORKA – WESTIDE sem vinna mun að undirbúningi 75MW virkjunnar við Þorskafjörð.  Undanfarin misseri hefur Bjarni M. Jónsson meistaranemi við Háskólasetrið á Ísafirði unnið að verkefni undir leiðsögn Þorsteins Inga sem falið hefur í sér að kanna möguleika virkjunar sjávarfalla sem byggjast á þverbrúun fjarða inn af Breiðafirði. Við mælingar á sjávarföllum og strandgerð í nokkrum völdum fjörðum fyrir vestan hefur komið í ljós að snjallasta lausnin gæti verið fólgin í að sameina vega- og brúargerð og nýta brýr sem hluta af hverfilhúsi sjávarfallavirkjunar. Við Þorskafjörð gæti uppsett afl verið nærri 200MW, en jafnaðarorka yrði um 75MW.

Aðgerð 2: Klára undirbúning á námskeiðinu Orkubóndinn á Ísafirði, þar sem áhugamönnum er kennt að virkja eigin orku. Búist er við að tvö hundruð og sextugasti nemandinn verði útskrifaður á þessu þriðja námskeiði sem haldið er í haust og hefur verið gríðarlega vinsælt.

Aðgerð 3: Setja af stað atvinnuskapandi verkefni í Skagafirði og hefja undirbúning að stofnun „GRETTIS-PRÓTEIN ehf“. til að búa til próteintöflur á Sauðárkróki fyrir vaxtarrækt og sem fæðubótaefni fyrir sveltandi heim. Nýsköpunarmiðstöð hefur aðsetur í Verinu á Sauðárkróki ásamt nokkrum öðrum stofnunum og er starfið nýlega hafið. Þar er m.a. unnið að verkefnum á sviði trefjatækni bæði fyrir steintrefjar og koltrefjar. Eitt af því sem kannað verður frekar í samráði við Matís og KS felur í sér að nýta miklu betur prótín sem framleiðsla mjólkurafurða á Sauðárkróki felur í sér og streymir út í Skagafjörð ónýtt. Í dag blasir við að úrgangur sem svarar til 50 þúsund manna byggðar streymir út í fjörðinn. Þá er unnið að því að stofna FabLab kennslustarfsstöð á Sauðárkróki.

Aðgerð 4: Að hefja vinnu við tengingu ThermIce vélar og ískrapframleiðslu á Akureyri. Þar er í gangi verkefni sem tengt er því að nýta afgangsvarma frá útblæstri bátavéla til þess að framleiða kæliorku. Þessi vinna sem tengd er frumkvöðlinum Davíð Gíslasyni og studd hefur verið af Nýsköpunarmiðstöð og Slippnum á Akureyri er tengd sprotanum ThermIce ehf. Frumgerð kælivélar er orðin til og hefur verið staðsett í Eldey, frumkvöðlasetrinu á Ásbrú á Reykjanesi.  Fiskibátur sem notar ThermIce vélina getur notað tímann á leið út á mið til þess að framleiða sinn eigin kæliís um borð án þess að nota nokkra nýja orku aðra en varmann frá vélinni.

Aðgerð 5: Ljúka undirbúningi að því að gera Onsen böð í japönskum stíl hluta af íslenskri ferðaþjónustu. Á Akureyri hefur Nýsköpunarmiðstöð unnið með Hrefnu Kristmannsdóttur við Háskólann á Akureyri og nokkrum nemendum við rannsóknir og þróun á stýringu vatnsgæða fyrir ferðaþjónustuna. Unnið hefur verið að skipulegum athugunum á því hvernig stýra megi vatnsgæðum, sýrustigi og hreinleika til þess að stuðla að því að ferðaþjónustuaðilar geti sett upp eigin böð eða spa – stöðvar.

Aðgerð 6: Ljúka undirbúningi græns iðngarðs á Húsavík. Nýsköpunarmiðstöð hefur sett upp starfsstöð á Húsavík og hefur m.a. verið að skoða möguleikann á því að nýta varmaorku frá svæðinu fyrir grænan efnaiðnað. Slíkur iðnaður yrði byggður upp þannig að hluti af afurð eins ferlis yrði hráefni í annan. Hér má til dæmis hugsa sér að byggja upp áburðarverksmiðju sem nýtti CO2 úr jarðhitagasi ásamt vetni sem til félli sem hráefni við klórgerð til nota í pappírsframleiðslu. Einnig væri unnt að framleiða eldsneyti úr kolefni sem tekið væri úr CO2 og vetni sem unnið yrði með rafgreiningu úr vatni.

Aðgerð 7: Klára viðskiptaáætlun fyrir H2OWATN. Á Austfjörðum þar sem Nýsköpunarmiðstöð er nýbúin að festa fótum vinnur hópur sem kallar sig H2OWATN að því að kanna útflutning á vatni í stórum stíl í skipum frá Djúpavogi.

Aðgerð 8: Hefja mælingar í ósnum í Hornafirði til að skoða möguleika á því að beisla orku sjávarfalla og sjávarstrauma.

Aðgerð 8: Hefja undirbúning við næstu FabLab smiðju sem sett verður upp á Sauðárkróki. FabLab er kennslu- og starfsmiðstöð á sviði tölvutækni og tölvulæsis og beinist að ýmiss konar framleiðslutækni. Nú rekur Nýsköpunarmiðstöð Fab Lab smiðju í Vestmannaeyjum í samvinnu við MIT háskólann í Bandaríkjunum og nú þarf að vinna að því að setja slíka upp á Sauðárkróki.

Aðgerð 9: Hefja athugun á íbót nýrra þátta í malbik á Íslandi með það fyrir augum að minnka slit og auka umhverfisvænleika þess. Í rannsóknastarfi Nýsköpunarmiðstöðvar á Keldnaholti er nú unnið að þróun í nýju malbikssetri, þar sem malbik, sem verður æ mikilvægara byggingarefni á íslandi, er þróað og bætt með tilliti til umhverfisþátta. Mjög fullkomin tæki eru notuð til prófana á sliti þess og skrifði en byggingarþáttur Nýsköpunarmiðstöðvar er að þróast meira og meira í átt að umhverfisþáttum bygginga og mannvirkja.

Aðgerð 10: Móta hugmyndina INNOVERSITY sem byggist á því að Nýsköpunarmiðstöð verði miðstöð þekkingarmiðlunar úr háskólarannsóknum, sem kallað er á ensku Technology Transfer Center. Alþjóðleg ráðgjafanefnd sem skilaði Menntamálaráðuneyti tillögum um úrbætur á mennta- og nýsköpunarkerfi Íslands fyrir nokkrum mánuðum lagði til að Nýsköpunarmiðstöð fengi þetta hlutverk. Með verkefninu mun Nýsköpunarmiðstöð koma til móts við þessar hugmyndir og efla enn frekar samvinnu við háskólana, bæði rannsóknir og þó einkum verkefni rannsóknanemenda. Verkefnið um virkjun Þorskafjarðar er einmitt dæmi um slíkt verkefni, þar sem nemandi í rannsóknanámi í Háskóla Íslands vinnur í samstarfi við Nýsköpunarmiðstöð að rannsóknaverkefni sem felur í sér mikla nýsköpun, í þessu tilfelli stofnun sprotafyrirtækisins Vesturorka-Westide.